Um PAXEL123

Paxel123 hlaut fyrstu verðlaun fyrir besta barnaefnið á netinu þann 5. febrúar 2013 í tilefni af Alþjóðlega netöryggisdeginum. Tveir aðilar deildu þessum verðlaunum og fara bæði verkefnin í evrópska samkeppni um besta barnaefnið á netinu í Evrópu.

PAXEL123.com vefurinn er ætlaður nemendum á leik- og grunnskólaaldri sem eru að stíga sín fyrstu skref í því að vinna með orð og hugtök tengd móðurmáli og stærðfræði. Aðgangur er og verður ókeypis, engar auglýsingar munu birtast hér, engrar skráningar er krafist og engum persónulegum upplýsingum er safnað um notendur.

Markmiðið með PAXEL123.com er að örva læsi í stærðfræði og móðurmáli með örvandi tölvuleikjum. Þá er einn leikur sem fjallar um örugga netnotkun. Fleiri leikir munu bætast reglulega við ásamt fleiri tungumálum auk þess sem það er í vinnslu að forrita suma leikina fyrir iPad.

Leikirnir á PAXEL123.com örva formskynjun, talnaskilning og rökhugsun auk þess sem þar er að finna rímleiki og stafarugl. Leikirnir henta einnig sem ítarefni við sérkennslu þ.m.t. að vinna með börnum af erlendum uppruna.

Hugmyndin að þessum leikjavef er sprottinn af vinnu Önnu Margrétar Ólafsdóttur leikskólastjóra í Nóaborg í Reykjavík, en leikskólinn hefur í rúm tíu ár haft stærðfræði og ritmál sem leiðarljós í vinnu með börnunum í leikskólanum. Mikið af leikefni barnanna sem tengist þessum leiðarljósum er heimagert s.s. ýmis spil og leikir. Það sem hefur verið vinsælast hjá börnunum þennan tíma hefur nú verið útfært í tölvuleiki á PAXEL123 auk þess sem nýir leikir bætast í hópinn.

Elín Ey og Eyþór Gunnarsson hafa samið stefin sem heyrast þegar leikirnir eru spilaðir. Tónlistin er í midi-skrám.

Eftirtöldum er þakkaður stuðningur við að gera Paxel123 að veruleika:

Nordplus – Nordiske Sprog og Kultur – nordplus.is

Kennarasamband Íslands – ki.is

Mennta- og menningarmálaráðuneytið – átak til að efla norræna málvitund og málskilning – Nordisk sprogkampagne – Norræna ráðherranefndin

Barnavinafélagið Sumargjöf

SAFT á Íslandi – saft.is

Mannréttindaráð Reykjavíkur

Þróunarsjóður námsgagna

 

Hægt er að hafa samband við okkur með því að senda tölvupóst á annamagga60(at)gmail.com eða með því að senda skilaboð á facebook síðunni okkar.

Til að spila leikina þarf ýmist að hafa Java eða Flash. Þú getur sótt Java með því að smella hér og Flash með því að smella hér.

Til að heyra tónlistina með leikjunum þarf að geta spilað midi-skrár í tölvunni. Ef þú getur ekki spilað midi-skrár vantar þig e.t.v. hugbúnað sem þú getur fundið hér..